నేడు బహిరంగ సభ

• బెంజిసర్కిల్‌, కార్పొరేషన్‌ నుంచి భారీ ప్రదర్శనలు
• ఏర్పాట్లు పూర్తి : వై వెంకటేశ్వరరావు
  

సిపిఎం విస్తృత సమావేశాల సందర్భంగా మంగళవారం విజయవాడ స్వరాజ్య మైదానం (పిడబ్యుడి గ్రౌండ్స్‌)లో నిర్వహించనున్న భారీ బహిరంగసభకు ఏర్పాట్లన్నీ పూర్తయ్యాయని పార్టీ రాష్ట్ర కార్యదర్శివర్గ సభ్యులు వై.వెంకటేశ్వరరావు తెలిపారు. సోమవారం పిడబ్ల్యుడి గ్రౌండ్‌(స్వరాజ్యమైదానం)లో ఏర్పాటు చేసిన విలేకరుల సమావేశంలో ఆయన మాట్లాడారు. ఏడో తేదీ నుండి విజయవాడలో జరుగుతున్న సిపిఎం విస్తృత సమావేశాలు మంగళవారం నాటికి ముగుస్తాయనీ, అనంతరం బహిరంగసభ ఉంటుందనీ వివరించారు. రెండు గంటలకు బెంజిసర్కిల్‌ నుంచీ, నగర కార్పొరేషన్‌ కార్యాలయం నుంచీ ప్రదర్శనలు ప్రారంభమవుతాయని, మధ్యాహ్నం మూడు గంటలకు సభ ప్రారంభమవుతుందని తెలిపారు. ఈ సభలో సిపిఎం ప్రధాన కార్యదర్శి ప్రకాశ్‌ కరత్‌, పశ్చిమ బెంగాల్‌, కేరళ, త్రిపుర ముఖ్యమంత్రులు బుద్ధదేవ్‌ భట్టాచార్య, వి.ఎస్‌.అచ్యుతానందన్‌, మాణిక్‌ సర్కార్‌, పొలిట్‌బ్యూరో సభ్యులు సీతారాం ఏచూరి, సిపిఎం రాష్ట్ర కార్యదర్శి బి.వి.రాఘవులు, కేంద్ర కమిటీ సభ్యులు మల్లు స్వరాజ్యం, తమ్మినేని వీరభద్రం, ఎం.ఎ.గఫూర్‌ ప్రసంగించనున్నారని వివరించారు. సభా ప్రాంగణంలోకి ప్రజలు వచ్చేందుకు నాలుగు ద్వారాలను ఏర్పాటు చేశామన్నారు. ప్రతినిధులు, మీడియా, సీనియర్‌ సిటిజన్లకు వేర్వేరుగా గ్యాలరీలు ఏర్పాటు చేసినట్లు వివరించారు. విలేకరుల సమావేశంలో సిపిఎం రాష్ట్ర కమిటీ సభ్యులు మిరియం వెంకటేశ్వర్లు, సిహెచ్‌.బాబూరావు, జాన్‌వెస్లీ, నగర కార్యదర్శి ఆర్‌.రఘు తదితరులు పాల్గొన్నారు.